Châteaubriant, baronnie, ville et paroisse

Inventaire de l'an 1548 – 1549.

Le compte que rendent Jehan Yvon et François Hubert, procureurs, et fabriqueurs de la paroisse de Saint-Jean-de-Béré, davant M. le commissaire-baillé de MM. les vicaires de monseigneur de Nantes, pour voir et ouïr ledict compte, receptes et myses que lesdicts Jehan Yvon et Hubert ont fait en ladicte procuration et fabrice d'empuys l'institution d'iceux Jehan Yvon et Hubert, jusques à la conclusion et dapte de ce présent compte quel rendent lesdicts Yvon et Hubert à Pierre Guaisneau et Guillaume Bodin, instituez procureurs et fabriqueurs de ladicte paroysse pour l'an présent, commençant de ce présent jour.

Se chargent, lesdicts Jehan Yvon et Hubert, procureurs des trésors et ornements de ladicte paroysse et église de Saint-Jean-de-Béré et Saint-Nicollas, à savoir :

D'une croix d'argent avec son estuy.

Item, une custode d'argent doré, en laquelle est un crucifix et une verrine de vitre o laquelle on porte le corps de Nostre-Seigneur au Sacre.

Item, une aultre custode d'argent doré, pour porter le corpus Domini aux mallades, sur la patte de laquelle custode y a un crucifix d'argent et les armes de feu monseigneur de Chasteaubriant.

Item, une petite custode d'argent avec un crucifix au-dessus, pour porter le corpus Domini aux mallades.

La grande custode avec la verrine a un estuy (c'est ce que nous appelons aujourd'hui l'ostensoir) et les deux autres n'en ont point.

Item, un encensier d'argent avec ses chaînettes d'argent, fors deux chaînons au bas qui sont de fer, et y a ung des petits chaînons rompuz qu'il faut faire abiller et y faire ung gros chaînon au hault qui se mettra à la grande boucle.

Item, ung calice d'argent doré avecq dix apostres au cerne dudict calice et ung crucifix sur la patte, avec la plattaine qui a ung saint Jehan.

Item, ung aultre calice d'argent doré avecq sa plattaine, qui sert aux dimanches.

Item, un aultre calice d'argent doré avec sa plattaine.

Item, un aultre calice d'argent dont la pommette en est dorée au sommait et au millieu.

Item, un aultre calice d'argent qui a une croix sur la patte, avec sa plattaine.

Item, un aultre petit calice d'argent avec sa plattaine, et poisent (pèsent), ladicte croix et les trois custodes, encensier et les six calices, comprenant le boys qui est en la croix et le foyier de l'encensier qui est de fer, le tout ensemble pèze trente marcs, six onces, un gros d'argent.

Et les six calices et l'encensier ont chacun son estuy.

Item, une patte de cuyvre pour mettre la croix.

Et la custode du Sacre a son estuy.

Item, deux grands chandelliers de cuyvre, pour mettre les cierges sur le grant aultel.

Item, deux chandelliers d'estain pezant dix-sept livres et demy, qui servent à Saint-Nycollas.

Item, deux petits chandelliers de cuyvre qui ont les deux pattes d'ahault (les pointes d'en haut) d'estain, servant à Saint-Nycollas.

Item, ouict orseulx (burettes) poizant neuf livres d'estain.

Item, un corporallier de fil d'or et d'argent à bâtons rompus, lequel a donné Robert Le Mestayer, l'un des tapiciers de feu monseigneur de Châteaubriant.

Item, un choaisible (chasuble) de velours violet, evec des fleurs de lys, semé de branches d'arbres, battu de toille d'or, et sert au vendredy sainct et le jour du Sacre, sans estolle ni fanon (manipule).

Un autre choaisible de satin bleu estoillé de fil d'or, qui sert durant les octaves du Sacre, avec deux estolles et un fanon.

Item, un autre choisible armoyé des armoyries du Bourgérard (1), avecq. son estolle et fanon.

Item, une chappe de velours noir avecques ung escusson de fil d'or armoyrié des armoyries de feu monseigneur de Châteaubriant, quelle fut donnée à l'obsèque de monseigneur de Châteaubriant.

Item, ung choisible de velours noir, avecques ses deux danmoires (2), estolle et fanons, et y a au-dessus à chacun son escusson de fil d'or, armoyés des armoyries de Châteaubriant.

Item, une chappe de satin noir avecq ung choisible de mesme, et deulx daumoires, deulx estolles et troys fanons ; les orfrays sont en satin blanc.

Item, ung drap mortuère de velours noir avecqs la croix de satin blanc à cinq escussons de fil d'or armoyés des armes de Châteaubriant.

Item, donnée en 1545 ung chasible figuré que donna le sieur de la Hyrelay avecq deulx danmoires, une chappe, deulx estolles et trois fanons de mesme, armoyés de troys fleurs de lys de fil d'argent avec lambeaulx (3).

Item, une chappe de velours cramoisy.

Item, ung choisible de damas blanc avecqs ses daumoires, estolles et fanons.

Item, ung chasuble de velours rouge avec deux daumoires armoyées de fusées avecqs estolles et fanons.

Item, ung choisible d'ostade noire avecqs ses daumoyres, estolles et chappe de mesme.

Item, ung choisible de velours rouge evec ses daumoyres bien usées.

Item, deux parements d'aultel de velours noir ; dans l'un y a quatre escussons, et l'autre cinq, de fil d'or, armoyés des armoyries de Châteaubriant servant au grant aultel à Saint-Nycollas. Celui qui sert en hault, a au mellieu un crucifix de fil d'or et d'argent.

Item, quatre parements d'aultel de satin noir avec les croix de satin blanc.

Item, deux aulnes et demye de satin blanc étant en sept pièces coupé en demi-lèze.

Item, ung dôsme en forme de chappelle de boiys couvert de satin broché d'or et d'argent avec deux brancars pour mettre et porter le corps de Notre-Seigneur à la procession, le jour du Sacre, quel a donné monsieur le prieur de Saint-Michel, Baudoyn Chrestien.

Item, une chappe de trippes de velours noir, où sont figures de trépassés.

Item, un drap mortuère de trippes de velours noyr avecqs la croix de satin blanc et les figures des trépassés.

Item, ung parement de velours rouge où y a un crucifix au mellieu.

Item, ung failly parement de velours rouge auquel y a l'Annonciation au mellieu.

1554. - Un parement et écharpe de damas violet figuré ; la doublure dudit parement est de sarge de soye blanc ; lequel parement est pour servir en escharpe àporter le corps de Notre-Seigneur aux malades. Lequel donna maître Jeahn Drouot et Jehanne Caris, sa compaigne. Autour dudict parement est une frange de soye violette.

Une robe à usage de femme, de satin cramoysé, laquelle donna noble escuyer François Dugué en mémoire de damoyselle Françoise du Boys-Riou, sa compaigne, pour faire une chapelle, savoir choaysible, daumouaires.

Item, quatre tailles de drap de soye pour servir aux festes de Notre-Dame et aux octaves du Sacre à la petite chapelle, à Saint-Nycollas.

Item, une bourse de drap d'or frinzé, avecqs les serrans (liens) de soye rouge, pour porter le corpus Domini.

Item, une bannière de velours cramoisy, où y a ung saint Jehan d'un causté et ung François de l'aultre, armoyé des armes de Châteaubriant et de Fouays assemblées ; laquelle donna deffuncte, haulte et puissante dame Françoise de Fouays, dame de Châteaubriant.

Item, une aultre bannière de velours cendré, bien usée. Ung plat d'estain pesant troys livres et demye, que feu missire Yves Talvatz donna.

Item, deulx grandes lantairnes pour porter corpus Domini, avecqs deulx pilletz de cyre, chacun de demye-livre de cyre.

Item, deulx pièces de toille de brin, le tout trente-cinq aulnes.

Item, un paquet de fil drugé à brin, contenant et pesant vingt-quatre livres, dont y a troys en peloton.

Item, dix-sept amyctz non benyctz.

Item, deulx nappes de brin machées de fil, non begnitz.

Item, une petite boette ronde de boys coupverte de cuir, où sont les enseignements et lettres de la ville de Châteaubriant.

Item, une cassette de boys, où sont les livres et enseignements des debvoirs qui sont deulz à tous les paroissiens de la paroisse de Béré.

Queulx ornements, trésors, acoustrements et aultres chauses cy-devant desclarées et mentionnées, ont été par lesdits Yvon et Hubert, procureurs, cedit jour baillés auxdits Guaisneau et Bodin, procureurs nouveaux, qui les ont prins en charge et promys d'en répondre aux paroissiens à la fin de cette année, à la manière accoustumée, ainsi et comme les précédents procureurs ont accoustumé faire les ung aux austres.

A l'année 1569, nous trouvons une mention digne d'être remarquée. Les procureurs-fabriqueurs Drouet et Bouscher se chargent d'une chapelle entière, sçavoir :

Chappe, choysible et deulx dammoyres garnyes de deulx estolles et troys fanons, de drap d'or frizé, dont le fond dudit drap est d'or traict, avecques les orfrays d'or fin et imaigé de broderyes, le tout doublé de bougrain, avecques quatre pièces de drap vert pour meptre entre lesdits ornements, de peur qu'ils ne se froissent et gastent.

Le tout quoy a été donné et présenté à la fabrice et paroisse de ceste ville et paroisse de Saint-Jean de Béré, sçavoir : par deffunct Angelot Blanchet, par son testament, à la valeur de 300 livres tournois ; et par Françoys Bourdon et Françoyse Guerrier, à présent sa femme et compaigne, le surplus de l'achapt desdits ornements, qui est la sôme de 100 livres tournois.

A la présentation et don desquels ornements, qui furent le jour et feste de Pâques 1569, il fut par les paroissiens consenty et promys que, en commémoration dudict deffunct Angelot Blanchet et des amys vivans et trépassés de luy et desdits Bourdon et femme, il serait en l'advenir, par le procureur de ladite fabrice, fait dire par chascun an, au jour de lundy des féeries de Pasques, une messe de Requiem, auparavant la partie de la procession dudit jour allant à Saint-Michel, et un Libera sur la fosse dudit feu Blanchet, qui sera payée par le procureur de ladite fabrice.